19/12/2024

IDEKOk Goi Mailako Bikain Ziurtagiria lortu du Euskararen sustapenean egindako lanagatik

IDEKOk euskararen sustapenean egindako lanagatik aitorpen mailarik altuena jaso du

Aitorpen hau euskararen erabilera eta sustapena bultzatzeko 24 urte baino gehiagoko konpromisoaren eta lan proaktiboaren emaitza da.

BRTA aliantzako kide den IDEKO zentro teknologikoak goi mailako Bikain ziurtagiria eskuratu du euskararen presentzia, erabilera eta kudeaketa normalizatzeko egindako ahaleginagatik. Aitortza hau Eusko Jaurlaritzak ematen duen euskararen normalkuntzari buruzko ziurtagiri ofizial gorenetakoa da.

Atzo, abenduaren 18an, IDEKOko ordezkariek Bikain ziurtagiria jaso zuten Donostiako Kursaal Jauregian ospatu zen Euskararen erabileraren aitortza-ekitaldian, Ibone Bengoetxea Otaolea Lehenengo lehendakariorde eta Kultura eta Hizkuntza Politikako sailburuak eta Sonia Rodriguez Rodriguezek, Kultura eta Hizkuntza Politikako Hizkuntza Ikerketa eta Koordinaziorako zuzendariaren eskutik.



Aurtengo ebaluazio prozesuan, idekok 800 eta 849 puntu arteko balorazioa eskuratu du, eta horri esker, goi mailako ziurtagiria eskuratzea lortu du.

Idekok bigarren aldiz parte hartu du prozesu honetan. 2016an erdi-mailako Bikain ziurtagiria (zilarrezkoa) lortu zuen, eta aurtengo ebaluazioak erakutsi du erakundeak nabarmen hobetu duela euskararen integrazioa eta sustapena bere eguneroko jardunean. Ebaluazioak azaroan zehar egin ziren eta Eusko Jaurlaritzaren Erreferentzia Marko Estandarraren (EME) arabera burutu dira, non zerbitzu hizkuntza eta lan hizkuntza ardatz nagusitzat hartzen diren.

Euskararekiko konpromisoa sendotuz

Ziurtagiri honek IDEKOk euskararekiko duen konpromiso sakona berresten du. Zentro teknologikoak 24 urte daramatza euskararen normalizazio plana garatzen, erakundearen arlo guztietan hizkuntzaren erabilera sustatzeko eta gizartean errotzeko helburuarekin. Horrez gain, IDEKOK aktiboki parte hartzen du euskararen aldeko ekimenetan, hala nola Korrikan, Euskararen Egunean eta Euskaraldian.

Bikain ziurtagiria Eusko Jaurlaritzak enpresei eta erakundeei ematen dien aitortza da, eta euskararen presentzia eta erabilera ebaluatzeko tresna publiko eta doakoa. Ebaluazio taldeek erakundearen instalazioak bisitatu eta hainbat adierazle aztertzen dituzte, hala nola irudi korporatiboa, bezeroekiko harremanak, barne komunikazioa, lan-tresnak, pertsonen kudeaketa eta kudeaketa sistema.

IDEKOren kasuan, emaitzek erakutsi dute euskararen integrazio eta erabilera maila bikaina dela, eta horrek goi mailako ziurtagiria lortzea ahalbidetu du.

IDEKOko langile guztiei eskerrik beroenak eta zorionak euskararen normalkuntzaren alde egin duten lanagatik. Horrela, IDEKOk euskararen sustapenean eta normalizazioan duen lidergoa berresten du, bai bere ingurunean, bai euskal gizartean.