11/02/2025

IDEKOk berdintasunaren aldeko konpromisoa berretsi du zientzia eta teknologiaren arloan 11F egunean

Gaur, Emakume eta Neska Zientzialarien Nazioarteko Egunean, IDEKOn gure konpromisoa berritzen dugu, aukera-berdintasuna sustatzeko zientzia eta teknologiaren esparruan. Badakigu berrikuntza benetakoa izateko talentu guztia kontuan hartu behar dela, eta horrek emakumeen presentzia STEAM arloetan bultzatzea eta ikusaraztea eskatzen du.

Gaur egun, IDEKO Zentro Teknologikoan 40 emakumek egiten dute lan, eta horietatik %78 ikertzaileak dira. Haien lan-eremuak funtsezkoak dira fabrikazio aurreratuan, hala nola ingeniaritza mekanikoa, softwarea, telekomunikazioak, ikusmen artifiziala, matematika eta datuen zientzia. Emakume profesional hauek ez dute soilik ezagutza eta esperientzia ekartzen, baizik eta etorkizuneko belaunaldientzako eredu ere badira.

Gaurko egun berezi honetan haiei ahotsa emateko, beren burua definitzeko edo identifikatzen dituzten bi hitz aukeratzeko eskatu diegu. Partekatzen dugun bideoan, haien istorioak ezagutzeko eta egunerokoan motibatzen dituen grina gertutik ikusteko aukera izango duzue.

Gainera, konpromiso hori sendotzeko, IDEKOk dagoeneko abian du bere bigarren Berdintasun Plana, datozen lau urteetan aukera-berdintasuna sustatzeko neurri zehatzak jasotzen dituena.

Etorkizuneko belaunaldiak inspiratzen

IDEKOn ez dugu emakumeen talentua soilik sustatzen gure taldean, baizik eta txikitatik neskatoak zientzia eta teknologiaren mundura gerturatzea ere bultzatzen dugu. Hezkuntza-programen, STEAM tailerren, eskoletara egindako bisiten eta ate ireki jardunaldien bidez, genero-estereotipoak apurtzen eta neskei erakusten diegu zientziak ez duela generorik. Teknologian eta ikerketan etorkizun oparoa ikus dezaten nahi dugu.

Berdintasunezko eta berritzaileagoa den etorkizuna

Munduaren garapena berrikuntzaren bidez erabakitzen den garai honetan, emakumeek zientzian duten parte-hartzea ez da soilik berdintasunaren aldeko apustua, baizik eta behar estrategikoa ere bada. IDEKOn inklusioa sustatzen jarraitzen dugu, emakumeek merezi duten espazioa eta aitortza izan ditzaten, aldaketaren eragile bihurtuz.

Gaur ospatzen dugu, hausnartzen dugu eta lanean jarraitzen dugu, neska eta emakume guztiek askatasunez hautatu ahal izan dezaten zientzia eta teknologiaren bidea.